Torisme
Los Pirenèus : vòstre luòc e vòstre moment
De la còsta atlantica escalabrosa a l’oest als cauds ribatges mediterranèus a l’est, cadun tròba son bonur dins los Pirenèus. A l’escasença de l’Annada dels Pirenèus, aquela annada de 2011 vos propausa de (tornar)descobrir los Pirenèus e lor ofèrta variada per la sason autòmne-ivern.
8 territòris rics, variats, unificats per una meteissa passion : Los Pirenèus
Descobrissètz uèit territòris a las montanhas millenàrias, totes emplenats d’una fauna e d’una flòra extraordinàrias. Uèit territòris abitats per quasi 18 milions de personas, que regòrjan de monuments que son lo rebat d’una istòria rica e viventa, amb de vilas e de vilatges mai que mai polits ont se mesclan la tradicion e la modernitat e ont l’on tròba una diversitat linguistica, gastronomica, culturala e economica en evolucion de contunh. Uèit territòris beneficiant d’un climat doç e ont l’ospitalitat es la costuma d’acuèlh del visitaire.
Se recercatz l’aventura, los Pirenèus vos ofrisson un molon d’activitats a vos copar lo buf. D’una excursion en raquetas en montanha nauta sus l’un dels pics magestuoses a la pratica del surf prèp de las rancaredas dominant l’ocean atlantic las mai conegudas d’Euròpa, o profechar de jornadas d’esquí incrediblas sus d’interminables quilomètres de pistas… Per aprèp se daissar anar a un fum de plasers qu’ofrisson tradicionalament las vilas e los vilatges de montanha nauta plen d’agradatge. Ça que la, se vos aimatz mai destesar, podètz causir de mirar lo paisatge d’autòmne impressionant e colorat dels Pirenèus o descobrir la cultura d’una tèrra que regòrja d’istòria. Perqué pas causir de vos destibar dins una estacion de cura termala cara a la mar o entre las cimas ? O perqué pas glopejar qualques vins fins locals dins l’una de las nombrosas cavas e vos destendre aprèp sus una plaja isolada banhada del solelh de la Mediterranèa ?
Qual que siá vòstra causida, trobaretz dins los Pirenèus las vacanças que recercàvetz.
- Miègjorn Pirenèus
-
Miègjorn Pirenèus
Lo massís pirenenc francés en Miègjorn-Pirenèus s’enorgulhiguèt d’associar amb magia l’espòrt, lo destibatge e lo benastre dins un encastre d’una immensa beutat, gràcias a sas installacions esportivas e sos 14 espas e centres termoludics gausissent d’una excellenta reputacion. L’un dels melhors representants d’aquela region es la vila suava de Luishon, un endrech de patz vertadièr, sens un sol fuòc de sinhalisacion, situat entre las 13 cimas las mai celèbras de la cadena e qu’ofrisson un albergament al pè de las pistas, en mai d’una estacion de cura termala prestigiosa. - Navarra
-
Navarra
En Navarra, las Selvas d’Irati e lo Pargue nacional d’Urbasa son de luòcs privilegiats per viure lo cambiament de sason e descobrir las sentors de bòsc banhat en se passejant sus un tapis de fuèlhas mòrtas demest sos fags centenaris. On vei tanben arribar l’autòmne dins las tèrras vinicòlas de la Zòna Mejana que revela tota son esplendor an aquel periòd de l’annada, al moment de las vendèmias. Un moment ideal per profechar dels desenats d’activitats, coma las passejadas a caval demest los vinhals o las visitas menadas de las cavas, que son propausadas an aquel periòd de l’annada. - Aquitània
-
Aquitània
Tota la còsta oest d’aquela region es bordada per l’ocean atlantic e envolopada per la doçor de son climat. Abriga d’importants tesaurs patrimonials coma la balma de Las Caums o la Valada de la Vesera, e es limitada al sud pels Pirenèus. Aquela situacion privilegiada fa de l’Aquitània una region de longa en movement dins sas colors e sas activitats. A l’autòmne, las colors verdas, jaunas e òcras s’installan per transformar lo siti en un luòc ideal per la randonada, familiala o esportiva, mentre que de novembre a abril, lo blanc e la nèu cobrisson sas cimas per propausar un ventalh sens fin d’espòrts d’ivern. Sens desbrembar lo blau de l’ocean e sas nombrosas activitats esportivas o de destibatge. - Catalonha
-
Catalonha
Los Pirenèus catalans son una tèrra plena d’endreches rics e contrastats amb un climat que varia de val en val, dempuèi las aigas lindas de la Mediterranèa fins als vents de l’Atlantica. En mai, abrigan d’espacis naturals, una arquitectura romana declarada al Patrimòni de l’Umanitat, coma l’impressionant Val del Boí, valadas emplenadas d’istòria e de montanhas qu’aculhisson fins a dètz estacions d’esquí alpin e sèis estacions d’esquí nordic banhadas d’un climat doç ideal per lisar jos un solelh fòrt caud. - Aragon
-
Aragon
Los Pirenèus aragoneses fargan lo sector lo mai naut del massís pirenenc amb las impressionantas cimas del Pic Aneto (3404 m.), del Posets (3375 m.) e del Mont Perdut (3335 m.). Los lacs glacièrs o los lacs de montanhas, las selvas drudas e las grandas valadas configuran un paisatge natural espandit e variat, plen de vida e d’agradatge pel visitaire que profecha d’una granda infraestructura ostalièira, de campings e d’un torisme rural per se pausar aprèp una jornada d’espòrt sus cèrtas de las famosas pistas d’esquí alpin coma Astún, Formigal, Panticosa, Cerler o Candanchú. - Lengadòc-Rosselhon
-
Lengadòc-Rosselhon
Aquel cunh de França ofrís una combinason atrasenta de plajas mediterranèas perfiechament entretengudas, de vilas istoricas e de cimas montanhosas nautas qu’abrigan 280 km de pistas d’esquí e d’espas. Sens pas cap de dobte, çò qu’atira lo mai en Lengadòc-Rosselhon son los 300 jorns minimals de solelh per an que representan lo mai fòrt ensolelhament en França. Es un luxe natural que fa de la region un luòc al climat ideal per las activitas coma lo canoé-cayac, l’escalada e l’equitacion. - Andòrra
-
Andòrra
La scèna mesura 468km² e los personatges per excelléncia son la natura e las activitats esportivas exterioras. L’Andòrra dispausa del domèni esquiable lo mai espandit del sud de l’Euròpa. Grandvalira e Vallnord, sas doas estacions d’esquí alpin, representan 3075 ectaras de domèni esquiable, 285 quilomètres de pistas, 111 remontadas e 1482 canons a nèu artificiala. Cal pas tanpauc desbrembar qu’aquel pichon país regòrja d’art roman, de musèus e de monuments, aital coma d’itineraris culturals, de fèstas e de tradicions que constituisson un eiretatge istoric ric en armonia perfiècha amb lo confòrt. - País Basc
-
País Basc
La natura del País Basc es plena de tenchas e de contrastes que representan una alquimia subtila d’un país en mosaïc. Son perfial geografic es format de montanhas costièiras coma las del Mont Jaizkibel o lo Pic de las Tres Coronas e de las cimas e sierras a l’interior, que la màger part fan l’objècte d’una proteccion en qualitat de Pargues Naturals. Mas lo País Basc es tanben un territòri urban qu’apond a sa magnifica gastronomia l’art lo mai abans-gardista, coma lo del musèu Guggenheim de Bilbao, e de las fèstas tradicionalas coma la tamborrada de Sant Sebastian al mes de genièr, rars exemples de sas innombrablas proposicions culturalas.
